لو على الحزن بنعرف نحزن, بس الحزن مالهوش مكان

.شكرا للناس الي دائما بتكلمنا و تسأل علينا لمجرد السؤال

.شكرا للناس الي لما بتبقى عايزة حاجة منك بتقولك أنها عايزة حاجة مش بتزوق الكلام

.شكرا أن في صديق أو صديقة موجودين في الحياة ديه بيسمعوك و يفضلوا وراك لحد ما تعمل الحاجة الصح و يطمنوا عليك

. شكرا لكل واحد صمم أنه يبدأ مشروع حلمه من الأول و ما أعتمدش على حد عشان واثق من نفسه و مش عايز يقع

.شكرا أن لسه في أغاني حلوة بتنزل في الراديو ليها معنى

.شكرا لكل حد بيصبح على الناس الصبح و بيبتسم للي قدامه مهما كان مين

.شكرا للي بيدي أشارة للي وراه و هو داخل حارة يمين أو شمال تمهيدا للي وراه

.شكرا للي بيقول شكرا و من فضلك وبيبتسملك

الحاجات ديه بتقل يوم عن يوم في الشارع المصري و وجودها لازم يتشكر البني أدم عليه عشان تدعمنا بالتفاؤل. الحياة في مصر مش سهلة مع الحالة الأقتصادية و الزحمة و الناس بقت مش مستحملة اقل كلمة من أي حد. لكن في اللحظات الأخيرة من أي ماتش في الأيام الأخيرة رجعت الروح الحلوة للشارع و أثبت الشارع المصري أنه قادر يفرح و يشجع و يرمي وراء ظهره شوية بس مش ناسي الي وراه و يفرح . و أثبت للعالم أنه أعظم أحلى جمهور.

لسه الراديو بيجيب أغاني للست و فيروز و تخلينا نرجع للجمال القديم و نخلطه بالحاضر. البواب لسه بيقولك صباح الفل يا باشا و لسه بتاع الفل بيقولك خد يا باشا اديه للجميلة الي جمبك حتى لو أختك. و الدعوة الحلوة الي بتتقال لدكتور لما بيساعد مريضه أو الأبتسامة على ست عجوزة وقفت و وقفت الشارع عشان تعديها. و الجميل لما تتلم مع الأصحاب و الأهل و تحكوا و تضحكوا. ثقافتنا فيها حاجات حلوة قوي و أهمها العيشة الهنية حتى لو بعيش و دقة. الحياة البسيطة الي في أخر الليل و بتقول الحمد الله و تنام حتى لو مش عارف هتعمل ايه في أكل تاني يوم. 

السبب من الكلام ده أن الشارع المصري من المشاكل الي عنده و الأفكار و الحواجز و التعب و التوتر بيرجع في أخر اليوم و يبتسم و يفرح و يقولك الحمد الله و خليها على الله

" لو على الحزن بنعرف نحزن, بس الحزن مالهوش مكان في بلدنا"